三十幾歲人，做咗將近十年嘢，換過幾份工。新工第一日，我覺得公司可能做唔長，所以決定第二日請辭。
`
朝早提早半個鐘到公司，執好枱面、設定好電腦，準備迎接新開始。老細好客氣，九點多就帶我逐個部門巡一圈，向每位主管介紹我，笑住口話「以後多多指教，大家互相配合」。我一路點頭微笑，一路留意各人反應——越睇，心越寒。
每個部門主管表面上客客氣氣，但眼神同語氣之間，分明係「你嚟你嘅，唔好搞我」嘅姿態。有個主管喺我沒走遠時就講：「睇你做得幾耐。」，之後去到另一個部門，我主動開口：「以後有咩唔明，可能要請教一下你。」，但佢即回「你主任嚟，駛乜我教?」，我即刻呆咗。成間公司瀰漫住一種強烈嘅山頭主義，各自為政，完全冇協作可言。
之後我問老細有冇統一嘅流程指引，佢笑笑口答：「我哋一向信晒部門主管，佢哋話事就得。」簡單講，呢間公司係一個「主管走咗就大亂」嘅地方。
放工搭車嗰程，我諗咗一陣就好快有決定。十年前嘅我或者會諗「試下啦」，但今日嘅我已經唔同。我知道自己嘅價值，亦清楚咩環境值得投放時間。
第二日朝早，我打電話同老細講，話自己唔適合份工，真正原因當然冇講。事後，冇後悔，冇忐忑，只有一種成年人嘅清醒——與其浪費時間改變一間唔對路嘅公司，不如將時間留俾真正值得嘅地方。
三十幾歲，唔再係用青春去試錯嘅年紀，反正仲有其他offer未推，做人真係要留一手。
*以上內容整理自網絡討論，僅供參考