HR比人in返轉頭 問我點捱到10年? #職場見聞
202511
話說面試咁多年，我都習慣咗最後例行公事咁問一句：「你有冇咩想了解公司？」
通常啲求職者都係問啲好普通嘅問題，例如公司架構、工作範圍、培訓福利之類。
點知，嗰日嚟咗個勁人。
我一問完，佢完全冇思考，秒回我一句：
「你喺度做咗幾耐？你覺得呢度人工點？升職快唔快？」
我心諗：吓？
佢見我愣咗，又追問：「你覺得上面啲管理好唔好相處？OT多唔多？公司文化健唔健康？」
語氣仲要好認真。
我唯有硬住頭皮答一下。我係呢度做咗超過10年....
點知佢眼前一亮，好似聽到咩關鍵字咁，立即接力：「哦——咁即係要捱10年先升到位？定係10年都升唔到？」
我心諗：大佬，你係嚟見工，唔係嚟審問哦喎。
佢又繼續問：「你仲留喺度，即係人工算過得去？如果唔係，你點捱到十年呀？」
我嗰刻真係感受到前所未有壓力，心諗: 我頭先有無咩得罪咗佢?
最爆笑係，佢開始總結——
「咁我大概明啦：人工一般、升職慢、管理睇彩數，但文化OK、你仲留係度。」
然後佢再淡淡一句：「我返去再考慮吓。」
嗰下真係完全反轉——
明明係我問佢想唔想加入公司，最後變成佢考慮接唔接受我哋。
送走佢後，我坐喺度深呼吸三次……其實佢係咪嚟玩野架?