不惑之年？我過了40被炒——人生之惑才開始 #職場見聞

本來以為可以一直做到退休，點知四十歲頭，就被炒咗。以前我哋部門係公司嘅搵錢機器，數據靚、業績穩，老板開會都會專登點名讚，話我哋係「核心動力」。嗰陣真係以為，捱得辛苦都值得，至少公司記得我哋嘅貢獻。

但自從行業開始萎縮，一切都變得好快。市場細咗、預算減咗、客戶縮手，各部門都開始講緊「整合」、「收編」。會議氣氛愈來愈差，大家講嘢都小心翼翼，好似隨時有人會被點名叫入會議室。

直到某日，HR 同老板叫我入會議室傾。我心裏其實早有預感，但聽到老板開口嗰句：「有同事話你越嚟越不合群，做嘢又出錯，公司決定同你解除合約。」

嗰瞬間，我反而冇嬲，只係覺得好荒謬。

因為我心裏清清楚楚，呢啲藉口都係假嘅。

講真，如果真係要炒人，就直講行業收縮、成本問題，點解要用咁幼稚嘅理由？

以前開會時嗰啲「辛苦晒」、「好重要」、「冇你唔得」……原來都只係利益到位時嘅場面話。

到唔需要你果刻，連基本尊重都慳返。

嗰刻，我真係第一次感受到——

原來所謂嘅忠誠、貢獻、同舟共濟，只要公司唔需要你，就全部化為烏有。

再來講番賠償部份，我有些驚訝，就只是基本的代通知金，年資賠償，完全沒有額外的補償。這一刻，我更認清，公司真係唔會同你講心。之後我睇咗都無3分鐘，就叫我去簽名，心諗，您好急咩?你呢份文件，簽唔簽名又有咩所謂，簽又係賠咁多，唔簽又係賠咁多，當刻，我開始生氣，沒有簽任何名，我自顧自就走去執野，決定不和公司有任何關係。

至於啲所謂「較好」嘅同事，我都冇再打招呼。因為我心入面隱約知——佢哋可能早就知道我要被處理，只係靜靜地等劇本發生。諗起最近嗰幾單奇怪嘅「要我交接」嘅要求，我就更加肯定。

走出公司嗰刻，我終於明嘅係：

原來一出去，大家都只係會點頭的陌生人。

後來我都實實在在出去搵工，履歷交到手軟，但面試永遠去到第二、三輪就無聲氣。起初我仲以為係自己四十歲、人工高，被嫌貴；但次次都係同一個 pattern，我開始覺得唔對路。

直到有一日，個獵頭同我講，語氣有啲為難：「你履歷唔差，但…有啲公司回覆得比較保守。」

我問佢：「保守係咩意思？」

佢停咗兩秒，含蓄咁講：「嗯…應該係你上一間公司嘅 feedback 唔算太正面啦。我唔方便講太多，但…你自己諗吓。」

就係呢句「唔方便講太多」，我已經明晒。

佢唔講，我都估到係乜。

原來唔係我搵唔到工，而係我前公司喺我背後加料，HR 要你走，仲要確保你「走咗以後都唔好翻身」。

嗰刻我真係心裏一沉：以前開會講咩「感謝付出」、「係公司重要資產」，原來全部都係講俾你聽嘅。

到唔需要你，連基本嘅尊重同後路都唔會留。

人生四十，第一次咁清楚睇到：喺職場，你離開嗰一刻開始，你就什麼都不是。

呢刻，我開始諗創業。但講真，比起興奮，我更多係迷惘。人生好似要被迫重新開始一次。我已經唔再係得我一個人——背後有家庭、有責任、有開支。做錯一步，唔係我一個人承擔，係成屋企陪我一齊跌落去，但我真係無路可再退了.........