樣樣要我包辦 日日加班到9點先走得 #職場見聞

而家經濟差，工難搵，所以我唔敢得失高層同主管。結果就係，幾份工作一齊壓落嚟，我要同時做，日日都好似打仗咁。速度有，但質素一定跌，專心唔到，做出嚟嘅嘢自然畀人投訴。

我其實已經向高層講過情況，但佢哋完全當冇聽過，仲係照樣將所有爛攤子推返畀我。日日加班到夜晚九點幾先走得甩，返到屋企沖個快手涼，買個快餐塞入口，十二點就爬上床。第二日一早，又要拖住沉重身體返公司。

而家我攰到成個人散晒，成日頭痛、心口翳悶，有時手都會震。坐低可以瞓，企住都會瞓，腦入面成日一片空白。飲咖啡係唯一頂得住嘅方法，但飲到胃痛、心跳快到好似爆出嚟。想轉工？市道差到根本冇選擇，只可以硬食。

最慘嘅係，成個人已經麻木，返工就好似行屍走肉咁，得個身體喺度，但腦同心已經抽離咗。